ಮಹಾಲಯ ಅಮಾವಾಸ್ಯೆಯ ಮರುದಿನ ಶರನ್ನವರಾತ್ರಿಯ ಪಾಡ್ಯದಿಂದ ಕರಗಗಳು ಹೊರಡುವುದು ಆದರೆ ಕರಗವನ್ನು ಹೊರುವಂತಹ ಅರ್ಚಕರು ಹದಿನೈದು ದಿನಗಳ ಮೊದಲೇ ಮದ್ಯ ಮಾಂಸಗಳನ್ನು ತ್ಯಜಿಸಿ ಪರಿಶುದ್ದರಾಗಿ ವ್ರತಾಚರಿಸಬೇಕು. ನವರಾತ್ರಿಯ ಮೊದಲ ದಿನ ಇವರಿಗೆ ಕಂಕಣ ಕಟ್ಟಲಾಗುವುದು, ನವರಾತ್ರಿ ದಿನಗಳಲ್ಲಿ ಇವರಿಗೆ ಪ್ರತ್ಯೇಕ ಆಹಾರ ಮತ್ತು ವಾಸ್ತವ್ಯವವನ್ನು ಏರ್ಪಡಿಸಲಾಗುವುದು. ಕರಗವನ್ನು ಹೊರುವ ದಿನ ಬೆಳ್ಳಿಗಿನ ಉಪಹಾರವಾಗಿ ಮೊಸರನ್ನವನ್ನು ಮಾತ್ರ ಸ್ವೀಕರಿಸುತ್ತಾರೆ. ನವರಾತ್ರಿ ದಿನಗಳಲ್ಲಿ ನಾಲ್ಕು ಶಕ್ತಿ ದೇವತೆಗಳಿಗೆ ಮೊಸರನ್ನ (ಸಿಹಿಅನ್ನ ಅಥವಾ ತಳಿಗೆ) ನೈವೇಧ್ಯವಾಗಿ ಅರ್ಪಿಸುತ್ತಾರೆ.