ಸೇವೆ, ಸಮರ್ಪಣೆ ಮತ್ತು ಮಾನವೀಯತೆಯ ಪ್ರತೀಕ

ಕೊಡಗು ಜಿಲ್ಲೆಯ ವೈದ್ಯಕೀಯ ಕ್ಷೇತ್ರದಲ್ಲಿ ಡಾ. ಸಿ.ಕೆ. ಅಜಿತ್‌ ಕುಮಾರ್‌ ಅವರ ಹೆಸರು ಚಿರಪರಿಚಿತ. ಎಂಬಿಬಿಎಸ್‌, ಎಂ.ಎಸ್‌., ಎಫ್.ಎ.ಐ.ಎಸ್.‌ ಪದವಿಗಳನ್ನು ಪಡೆದಿರುವ ಇವರು, ಸುಮಾರು 47 ವರ್ಷಗಳಿಂದ ತಮ್ಮನ್ನು ವೈದ್ಯಕೀಯ ಸೇವೆಗೆ ಸಮರ್ಪಿಸಿಕೊಂಡಿದ್ದಾರೆ. ಅವರ ಸುದೀರ್ಘ ವೃತ್ತಿಜೀವನವು ನಿಸ್ವಾರ್ಥ ಸೇವೆ, ಅಸಂಖ್ಯಾತ ಜೀವಗಳನ್ನು ಉಳಿಸಿದ ಶಸ್ತ್ರಚಿಕಿತ್ಸೆಗಳು ಮತ್ತು ಮಾನವೀಯ ಮೌಲ್ಯಗಳಿಗೆ ಬದ್ಧತೆಯ ಪ್ರತೀಕವಾಗಿದೆ.

ವೃತ್ತಿಜೀವನದ ಹೆಜ್ಜೆಗುರುತುಗಳು

ಡಾ. ಅಜಿತ್‌ ಕುಮಾರ್‌ ಅವರು 1971 ರಿಂದ 1978ರ ಅವಧಿಯಲ್ಲಿ ಪ್ರತಿಷ್ಠಿತ ಮೈಸೂರು ಮೆಡಿಕಲ್‌ ಕಾಲೇಜಿನಿಂದ ಎಂಬಿಬಿಎಸ್‌ ಪದವಿಯನ್ನು ಪಡೆದರು. 1978ರ ಮೇ 8ರಂದು ಹುಣಸೂರಿನ ಸರಕಾರಿ ಆಸ್ಪತ್ರೆಯಲ್ಲಿ ವೈದ್ಯಕೀಯ ಅಧಿಕಾರಿಯಾಗಿ ತಮ್ಮ ವೃತ್ತಿಜೀವನವನ್ನು ಆರಂಭಿಸಿದರು. ನಂತರ, 1980ರಲ್ಲಿ ಮೈಸೂರಿನ ಕೆ.ಆರ್.‌ ಆಸ್ಪತ್ರೆಗೆ ವರ್ಗಾವಣೆಗೊಂಡು 1985ರವರೆಗೆ ಸರ್ಜನ್‌ ಆಗಿ ಸೇವೆ ಸಲ್ಲಿಸಿದರು. ಅಲ್ಲಿಂದ ಮೈಸೂರು ತಾಲ್ಲೂಕಿನ ಟಿ.ನರಸೀಪುರ ಮತ್ತು ಗುಂಡ್ಲುಪೇಟೆ ತಾಲ್ಲೂಕುಗಳಲ್ಲಿ ತಮ್ಮ ಸೇವೆಯನ್ನು ಮುಂದುವರೆಸಿದರು. 1992ರಲ್ಲಿ ಮಡಿಕೇರಿಯಲ್ಲಿರುವ ಕೊಡಗು ಜಿಲ್ಲಾ ಆಸ್ಪತ್ರೆಗೆ ಹಿರಿಯ ಸರ್ಜನ್‌ ಆಗಿ ವರ್ಗಾವಣೆಗೊಂಡರು. ಈ ಅವಧಿಯಲ್ಲಿ, 1990-92ರ ನಡುವೆ ಮೈಸೂರು ಮೆಡಿಕಲ್‌ ಕಾಲೇಜಿನಿಂದ ಶಸ್ತ್ರಚಿಕಿತ್ಸೆಯಲ್ಲಿ ಎಂ.ಎಸ್‌. ಪದವಿಯನ್ನು ಪಡೆದು ತಮ್ಮ ಪರಿಣತಿಯನ್ನು ಹೆಚ್ಚಿಸಿಕೊಂಡರು. ಅಂತಿಮವಾಗಿ, ಕೊಡಗು ಜಿಲ್ಲಾ ಆಸ್ಪತ್ರೆಯಲ್ಲಿ ಆರ್‌ಎಂಒ (ರೆಸಿಡೆಂಟ್ ಮೆಡಿಕಲ್ ಆಫೀಸರ್)‌ ಮತ್ತು ಡಿಸ್ಟ್ರಿಕ್‌ ಸರ್ಜನ್‌ ಆಗಿ ನಿವೃತ್ತಿ ಹೊಂದಿದರು. ನಿವೃತ್ತಿಯ ನಂತರವೂ ಅವರ ಸೇವಾ ಮನೋಭಾವ ನಿಲ್ಲಲಿಲ್ಲ. ಸುಳ್ಯದ ಕೆ.ವಿ.ಜಿ. ಮೆಡಿಕಲ್‌ ಕಾಲೇಜಿನಲ್ಲಿ ಸರ್ಜನ್‌ ವಿಭಾಗದಲ್ಲಿ ಸಹಾಯಕ ಪ್ರಾಧ್ಯಾಪಕರಾಗಿ ಕಾರ್ಯನಿರ್ವಹಿಸಿದರು. ಪ್ರಸ್ತುತ, ಕಳೆದ 10 ವರ್ಷಗಳಿಂದ ಮಡಿಕೇರಿಯ ವೈವಸ್‌ ಆಸ್ಪತ್ರೆಯಲ್ಲಿ ಶಸ್ತ್ರಚಿಕಿತ್ಸೆ ಮತ್ತು ಎಂಡೋಸ್ಕೋಪಿ ತಜ್ಞರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಮರೆಯಲಾಗದ ವೈದ್ಯಕೀಯ ಸವಾಲುಗಳು

“ಸಾಮಾಜಿಕ ಸೇವೆಯಲ್ಲಿ ನನ್ನನ್ನು ತೊಡಗಿಸಿಕೊಳ್ಳಬೇಕೆಂಬ ಆಸೆಯಿಂದಲೇ ನಾನು ವೈದ್ಯಕೀಯ ಕ್ಷೇತ್ರವನ್ನು ಆಯ್ಕೆ ಮಾಡಿಕೊಂಡೆ” ಎನ್ನುವ ಡಾ. ಅಜಿತ್‌ ಕುಮಾರ್‌ ಅವರು, ತಮ್ಮ ಸೇವಾವಧಿಯಲ್ಲಿ ಎದುರಿಸಿದ ಅದೆಷ್ಟೋ ಸವಾಲಿನ ಪ್ರಕರಣಗಳನ್ನು ಧೈರ್ಯದಿಂದ ಎದುರಿಸಿ ಯಶಸ್ವಿ ಶಸ್ತ್ರಚಿಕಿತ್ಸೆಗಳನ್ನು ನಡೆಸಿದ್ದಾರೆ. ಅವರ ವೃತ್ತಿಜೀವನದಲ್ಲಿ ಅನೇಕ ಮರೆಯಲಾಗದ ಘಟನೆಗಳಿವೆ:

• ಗ್ಯಾಂಗ್ರೀನ್‌ ಮತ್ತು ಅನಿರ್ನಿಯಾ ಪ್ರಕರಣ: ಗ್ಯಾಂಗ್ರೀನ್‌ ಮತ್ತು ಅನಿರ್ನಿಯಾ ಸಮಸ್ಯೆಯಿಂದ ಸಾವು-ಬದುಕಿನ ಮಧ್ಯೆ ಹೋರಾಡುತ್ತಿದ್ದ ವ್ಯಕ್ತಿಯೊಬ್ಬರಿಗೆ ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿ ಜೀವ ಉಳಿಸಿದ ಪ್ರಸಂಗ ಅವರ ನೆನಪಿನಲ್ಲಿ ಅಚ್ಚಳಿಯದೆ ಉಳಿದಿದೆ.
• ಅಲ್ಸರ್‌ ಬಸ್ಟ್‌ ಪ್ರಕರಣ: ಅಲ್ಸರ್‌ ಬಸ್ಟ್‌ ಆಗಿ ಸಾವನ್ನಪ್ಪಿದ್ದಾರೆ ಎಂದು ವೈದ್ಯಕೀಯವಾಗಿ ನಿರ್ಧರಿಸಲ್ಪಟ್ಟಿದ್ದ ವ್ಯಕ್ತಿಯೊಬ್ಬರನ್ನು, ಕುಟುಂಬದವರ ಒತ್ತಾಯದ ಮೇರೆಗೆ ಡಾ. ರಾಘವ್‌ ಅವರನ್ನು ತುರ್ತಾಗಿ ಕರೆಸಿ ಅರಿವಳಿಕೆ ನೀಡಿದಾಗ ಸ್ವಲ್ಪ ಉಸಿರಾಟ ಬಂದ ಸಂದರ್ಭದಲ್ಲಿ, ಶಸ್ತ್ರಚಿಕಿತ್ಸೆ ನಡೆಸಿ ಆ ವ್ಯಕ್ತಿಯ ಜೀವವನ್ನು ಉಳಿಸಿದ್ದು ಅವರ ವೃತ್ತಿಜೀವನದ ಮಹತ್ವದ ಕ್ಷಣಗಳಲ್ಲಿ ಒಂದಾಗಿದೆ.
• ಒಂದು ತಿಂಗಳ ಮಗುವಿನ ಪ್ರಕರಣ: ಮಂಗಳೂರಿನಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿ ಕರೆತಂದಿದ್ದ ಒಂದು ತಿಂಗಳ ಮಗುವೊಂದರ ಹೊಟ್ಟೆಯ ಭಾಗದ ಹೊಲಿಗೆ ಬಿಟ್ಟು ಕರುಳು ಹೊರಗೆ ನೇತಾಡುತ್ತಿತ್ತು. ಆ ಕಡುಬಡವರಾದ ಪೋಷಕರ ನೋವನ್ನು ಅರಿತು, ಡಾ. ರಾಘವ್‌ ಅವರ ಸಹಾಯದಿಂದ ಅರಿವಳಿಕೆ ನೀಡಿ ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿ ಆ ಮಗುವನ್ನು ಬದುಕಿಸಿದ್ದು, ಅವರ ಮಾನವೀಯ ಸ್ಪರ್ಶಕ್ಕೆ ಸಾಕ್ಷಿಯಾಗಿದೆ.

ವೈದ್ಯಕೀಯದಲ್ಲಿ ಮಾನವೀಯ ಸ್ಪರ್ಶ ಮತ್ತು ಭವಿಷ್ಯದ ದೃಷ್ಟಿ

ವೈದ್ಯಕೀಯ ಕ್ಷೇತ್ರದಲ್ಲಿ ಹೊಸ ತಂತ್ರಜ್ಞಾನಗಳು ಮತ್ತು ಕೃತಕ ಬುದ್ಧಿಮತ್ತೆ (AI) ಪ್ರಮುಖ ಪಾತ್ರ ವಹಿಸುತ್ತಿದ್ದರೂ, ವೈದ್ಯರು ಮಾನವೀಯ ನೆಲೆಗಟ್ಟಿನ ಮೇಲೆ ಸೇವೆ ಸಲ್ಲಿಸುವುದು ಅತಿ ಮುಖ್ಯ ಎಂದು ಡಾ. ಅಜಿತ್‌ ಕುಮಾರ್‌ ದೃಢವಾಗಿ ಒತ್ತಿ ಹೇಳುತ್ತಾರೆ. “ಕೃತಕ ಬುದ್ಧಿಮತ್ತೆಯಲ್ಲಿ ಮಾನವೀಯ ಸ್ಪರ್ಶ ಇರುವುದಿಲ್ಲ, ಆದರೆ ವೈದ್ಯರಿಗೆ ಮಾನವೀಯತೆ ಅತೀ ಮುಖ್ಯವಾದ ಗುಣವಾಗಿದೆ” ಎಂದು ಅವರು ನಂಬುತ್ತಾರೆ. ತುರ್ತು ಸಂದರ್ಭಗಳಲ್ಲಿ ರೋಗಿಗಳ ಅವಶ್ಯಕತೆಗಳನ್ನು ಅರಿತುಕೊಂಡು ಸೂಕ್ತ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಾಮರ್ಥ್ಯ ವೈದ್ಯರಿಗೆ ಇರಬೇಕು. ಯಾವುದೇ ಸಂದೇಹಗಳು ಬಂದಾಗ, ಹೆಚ್ಚಿನ ಮಾಹಿತಿಗಾಗಿ ತಜ್ಞ ವೈದ್ಯರನ್ನು ಸಂಪರ್ಕಿಸಬೇಕು ಎಂದು ಅವರು ಸಲಹೆ ನೀಡುತ್ತಾರೆ.

ಆರೋಗ್ಯಕರ ಜೀವನಕ್ಕೆ ಸಲಹೆ

ಡಾ. ಅಜಿತ್‌ ಕುಮಾರ್‌ ಅವರು ರೋಗಿಗಳಿಗೆ ತಮ್ಮ ದೇಹಕ್ಕೆ ಅನುಗುಣವಾಗಿ ಸಮತೋಲಿತ ಆಹಾರ ಸೇವಿಸಿ ಆರೋಗ್ಯ ಕಾಪಾಡಿಕೊಳ್ಳಬೇಕೆಂದು ಕಿವಿಮಾತು ಹೇಳುತ್ತಾರೆ. ಅವರ ಪ್ರಕಾರ, ಉತ್ತಮ ಜೀವನಶೈಲಿ ಮತ್ತು ಸಮರ್ಪಕ ಆಹಾರ ಪದ್ಧತಿಯು ಅನೇಕ ರೋಗಗಳನ್ನು ತಡೆಗಟ್ಟುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಡಾ. ಸಿ.ಕೆ. ಅಜಿತ್‌ ಕುಮಾರ್‌ ಅವರ ಜೀವನ ಮತ್ತು ವೃತ್ತಿಜೀವನವು ವೈದ್ಯಕೀಯ ಸೇವೆಗೆ ಸಮರ್ಪಣಾ ಮನೋಭಾವ, ಮಾನವೀಯತೆ ಮತ್ತು ಸದಾ ಕಲಿಯುವ ಇಚ್ಛೆಗೆ ಉತ್ತಮ ಉದಾಹರಣೆಯಾಗಿದೆ. ಕೊಡಗಿನ ಜನತೆಗೆ ಅವರ ಸೇವೆ ಸದಾ ಸ್ಮರಣೀಯ.

ಸಂಪರ್ಕ ಮಾಹಿತಿ