ಬೆಳಕಿನ ಹಾದಿ: ಮಹಮ್ಮದ್ ಹನೀಫ್ ಅವರ ದೃಷ್ಟಿಯಲ್ಲಿ ಮಡಿಕೇರಿಯ ಎ.ಎಲ್.ಜಿ. ಕ್ರೆಸೆಂಟ್ ಶಾಲೆಯ ಯಶೋಗಾಥೆ

ಮಡಿಕೇರಿಯ ಶೈಕ್ಷಣಿಕ ಕ್ಷೇತ್ರದಲ್ಲಿ ಮೌನ ಕ್ರಾಂತಿ ಮಾಡುತ್ತಿರುವ ಎ.ಎ.ಲ್.ಜಿ. ಕ್ರೆಸೆಂಟ್ ಶಾಲೆಯ ಬಗ್ಗೆ ನಾವು ತಿಳಿದುಕೊಳ್ಳಲು ಹೋದಾಗ, ನಮ್ಮನ್ನು ಸ್ವಾಗತಿಸಿದ್ದು ಈ ಸಂಸ್ಥೆಯ ಕಾರ್ಯದರ್ಶೀ ಮಹಮ್ಮದ್ ಹನೀಫ್ ಅವರು. ಅವರೊಂದಿಗೆ ನಡೆಸಿದ ಸುದೀರ್ಘ ಸಂದರ್ಶನದಲ್ಲಿ ಅವರು ತಮ್ಮ ಜೀವನದ ಹಾದಿ, ಶಾಲೆಯ ಹುಟ್ಟು ಮತ್ತು ಶಿಕ್ಷಣದ ಮೇಲಿನ ತಮ್ಮ ಕಾಳಜಿಯನ್ನು ತೆರೆದಿಟ್ಟರು. ಅವರ ಆ ಮಾತುಗಳು ಇಲ್ಲಿವೆ...

ಮಡಿಕೇರಿಯ ಸುಂದರ ಪರಿಸರದಲ್ಲಿ ಜ್ಞಾನದ ದೀಪವಾಗಿ ಬೆಳಗುತ್ತಿರುವ ಎ.ಎಲ್.ಜಿ. ಕ್ರೆಸೆಂಟ್ ಶಾಲೆ

ನನ್ನ ಬಾಲ್ಯದ ನೆನಪುಗಳು ಮತ್ತು ಇಂದಿನ ಶಿಕ್ಷಣ

"ನಾವು ಬೆಳೆದದ್ದು ಮಡಿಕೇರಿಯ ಮಣ್ಣಿನಲ್ಲಿ. ಅಂದು ಹಿಂದುಸ್ತಾನಿ ಶಾಲೆ, ಸರ್ಕಾರಿ ಪುರಸಭೆಯ ಶಾಲೆಗಳಲ್ಲಿ ನಾವು ಕಲಿತೆವು. ಅಲ್ಲಿ ನಮಗೆ ಗುಣಮಟ್ಟದ ಶಿಕ್ಷಣ ಸಿಕ್ಕಿತ್ತು. ಅಂದು ನನ್ನ ಜೊತೆ ಬೆಂಚಿನಲ್ಲಿ ಕುಳಿತವರು ಇಂದು ಹೈಕೋರ್ಟ್ ವಕೀಲರಾಗಿದ್ದಾರೆ, ಚಾರ್ಟಡ್‌ ಅಕೌಟಂಟ್‌, ವೈದ್ಯರು ಮುಂತಾದ ದೊಡ್ಡ ದೊಡ್ಡ ಹುದ್ದೆಗಳಲ್ಲಿದ್ದಾರೆ. ಆದರೆ ಇಂದು ಪರಿಸ್ಥಿತಿ ಬದಲಾಗಿದೆ. ಶಿಕ್ಷಣ ಈಗ ಒಂದು ಮಾರುಕಟ್ಟೆಯಂತಾಗಿದೆ, ದುಬಾರಿ ಬೆಲೆಯ ವ್ಯಾಪಾರವಾಗಿಬಿಟ್ಟಿದೆ."

ಸಂದರ್ಶನದ ಒಂದು ಪ್ರಮುಖ ಕ್ಷಣ: ಹನೀಫ್ ಅವರು ತಮ್ಮ ಗತಕಾಲವನ್ನು ನೆನಪಿಸಿಕೊಳ್ಳುತ್ತಾ ಹೀಗೆ ಹೇಳಿದರು - "1992 ರಲ್ಲಿ ನನ್ನ ಮೊದಲ ಮಗನ ಅಡ್ಮಿಷನ್ ಸಲುವಾಗಿ ತುಂಬಾ ಕಷ್ಟ ಪಡಲಾಯಿತು. ಅಂದು ಮಡಿಕೇರಿಯಲ್ಲಿ ಶಾಲೆಗಳು ಕಡಿಮೆ ಇತ್ತು. ಅಂದು ಸುಮಾರು 40 ಮಕ್ಕಳಿಗೆ ಸೀಟು ಸಿಗದೆ ಶಿಕ್ಷಣದಿಂದ ವಂಚಿತರಾಗಬೇಕಾಯಿತು. ಈ ನೋವು ನನ್ನನ್ನು ಕಾಡತೊಡಗಿತು. ಕೇವಲ ಶ್ರೀಮಂತರಿಗೆ ಮಾತ್ರವೇ ಶಿಕ್ಷಣ ಸೀಮಿತವೇ ಎಂಬ ಪ್ರಶ್ನೆ ಮೂಡಿ, ನಮ್ಮ ಸಮಾನ ಮನಸ್ಕರ ಜೊತೆಗೂಡಿ 1992 ರಲ್ಲಿ ಇಂದಿನ ಸಂಸ್ಥೆಯನ್ನು ಆರಂಭಿಸಿದೆವು."

ನಮ್ಮ ಶಾಲೆ - ಇದು ಯಾರ ವೈಯಕ್ತಿಕ ಸ್ವತ್ತಲ್ಲ

"ನಾನು ಯಾವಾಗಲೂ ನಂಬುವ ಒಂದು ಮಾತಿದೆ - ಶಿಕ್ಷಣವು ಕಟ್ಟಕಡೆಯ ವ್ಯಕ್ತಿಗೂ ಸಿಗಬೇಕು. ನಮ್ಮ ಶಾಲೆಯ ಮೇಲೆ ಯಾರಿಗೂ 'ಓನರ್ಶಿಪ್' ಇಲ್ಲ. ಇದು ನೂರುಲ್ ಇಸ್ಲಾಂ ಎಜುಕೇಶನ್ ಟ್ರಸ್ಟ್‌ನ ಅಧೀನದಲ್ಲಿದೆ. ಬರುವ ಪ್ರತಿಯೊಂದು ರೂಪಾಯಿ ಲಾಭವನ್ನೂ ನಾವು ಮತ್ತೆ ಶಾಲೆಯ ಅಭಿವೃದ್ಧಿಗೇ ಬಳಸುತ್ತೇವೆ. ಇದೊಂದು ಸಂಪೂರ್ಣ ಚಾರಿಟೇಬಲ್ ಸಂಸ್ಥೆ."

ನಮ್ಮ ಕನಸು (Vision)

ಸರ್ಚ್‌ ಕೊಡಗು ನಮ್ಮ ವಾಟ್ಸಾಪ್‌ ಕಮ್ಯುನಿಟಿ ಲಿಂಕ್‌

ವಾಟ್ಸಾಪ್ ಕಮ್ಯುನಿಟಿ ಸೇರಿಕೊಳ್ಳಿ

ಸರ್ಚ್‌ ಕೊಡಗು ನಮ್ಮ ವಾಟ್ಸಾಪ್‌ ಚಾನಲ್‌ ಲಿಂಕ್‌

ವಾಟ್ಸಾಪ್ ಚಾನಲ್‌ ಫಾಲೋ ಮಾಡಿ

ಬಡವ ಮತ್ತು ಮಧ್ಯಮ ವರ್ಗದ ಮಕ್ಕಳಿಗೆ ಅತ್ಯಂತ ಕಡಿಮೆ ವೆಚ್ಚದಲ್ಲಿ ಅಂತರಾಷ್ಟ್ರೀಯ ಮಟ್ಟದ ಶಿಕ್ಷಣ ನೀಡುವುದು.

ನಮ್ಮ ಧ್ಯೇಯ (Mission)

ಸಮಾಜದಲ್ಲಿ ಕೋಮು ಸಾಮರಸ್ಯ ಮೂಡಿಸಿ, ಜ್ಞಾನದ ಮೂಲಕ ಕತ್ತಲೆಯನ್ನು ಓಡಿಸಿ ಶಾಂತಿಯುತ ಬೆಳಕು ನೀಡುವುದು.

ಆಧುನಿಕತೆಯ ಜೊತೆ ಹೆಜ್ಜೆ

"ಸಂದರ್ಶನದ ವೇಳೆ ಅವರು ತಮ್ಮ ಸ್ಮಾರ್ಟ್ ಕ್ಲಾಸ್ ತೋರಿಸುತ್ತಾ ಖುಷಿಯಿಂದ ನುಡಿದರು - 'ಈಗಿನ ಕಾಲಕ್ಕೆ ತಕ್ಕಂತೆ ನಾವು ವಿಷುವಲ್ ಟೀಚಿಂಗ್ ಆರಂಭಿಸಿದ್ದೇವೆ. ಇದರಿಂದ ಮಕ್ಕಳು ಅತಿ ವೇಗವಾಗಿ ಗ್ರಹಿಸುತ್ತಿದ್ದಾರೆ. ವಿಶೇಷವಾಗಿ ನಮ್ಮಲ್ಲಿ ಕಲಿತ ಮಕ್ಕಳು ಮೂರೇ ತಿಂಗಳಲ್ಲಿ ಇಂಗ್ಲಿಷ್‌ನಲ್ಲಿ ಮಾತಾಡೋದನ್ನು ನೋಡುವುದೇ ಒಂದು ಸಂಭ್ರಮ'."

ನಮ್ಮ ಶಾಲೆಯ ಸುಸಜ್ಜಿತ ಸ್ಮಾರ್ಟ್ ಕ್ಲಾಸ್ - ತಾಂತ್ರಿಕ ದೂರದೃಷ್ಟಿಯ ಫಲ

ಕನ್ನಡ ಮತ್ತು ನೈತಿಕತೆಯ ಮೇಲಿನ ಒಲವು

"ಕನ್ನಡ ನಾಡಿನ ಮೇಲೆ ನಮಗೆ ಅಪಾರ ಪ್ರೇಮ. ನಮ್ಮ ಶಾಲೆಯಲ್ಲಿ 'ಕನ್ನಡ ಕಲರವ' ಕ್ವಿಜ್ ನಡೆಸಿದಾಗ ಕೊಡಗಿನ ಎಂಟು ಸಿಬಿಎಸ್ ಸಿ ಶಾಲೆಗಳ ನಡುವೆ ನಾವು ಪ್ರಥಮ ಬಂದೆವು. ಆದರೆ ಸಂಘಟಕರಾಗಿ ನಮ್ಮಲ್ಲಿ ಪಕ್ಷಪಾತ ಇರಬಾರದೆಂದು ನಾವು ಆ ಬಹುಮಾನವನ್ನು ಇತರರಿಗೆ ಬಿಟ್ಟುಕೊಟ್ಟೆವು. ನಮ್ಮ ಮಕ್ಕಳಿಗೆ ನಾವು ಕೇವಲ ಅಂಕಗಳನ್ನು ಮಾತ್ರವಲ್ಲ, ನೈತಿಕತೆಯನ್ನು ಕಲಿಸುತ್ತೇವೆ."

ಶಾಲೆಯಲ್ಲಿ ನಡೆದ ಕನ್ನಡ ರಾಜ್ಯೋತ್ಸವದ ಅದ್ಧೂರಿ ಆಚರಣೆ

ನಾವು ಪಾಲಿಸುವ ಶಿಸ್ತು ಮತ್ತು ಕಾಳಜಿ

ಸಂದರ್ಶನದ ಅಂತ್ಯದಲ್ಲಿ ಅವರು ಪೋಷಕರಿಗೆ ಕೆಲವು ಕಿವಿಮಾತುಗಳನ್ನು ಹೇಳಿದರು:

"ಮಕ್ಕಳು ಮೊಬೈಲ್ ಚಟಕ್ಕೆ ಬೀಳದಂತೆ ನಾವು ಪ್ರತಿದಿನ ಬ್ಯಾಗ್ ಚೆಕ್ ಮಾಡುತ್ತೇವೆ."
"ಹಾಜರಾತಿ 85% ಇರಲೇಬೇಕು ಎಂಬುದು ನಮ್ಮ ಕಟ್ಟುನಿಟ್ಟಿನ ನಿಯಮ."
"ಕೋವಿಡ್ ಸಂದರ್ಭದಲ್ಲಿ ಸಂಕಷ್ಟದಲ್ಲಿದ್ದ ಪೋಷಕರಿಗೆ ನಾವು 50% ಫೀಸ್ ರಿಯಾಯಿತಿ ನೀಡಿ ಅವರ ಜೊತೆ ನಿಂತೆವು."

ಸಂಕ್ಷಿಪ್ತ ಮಾಹಿತಿ

380+ ವಿದ್ಯಾರ್ಥಿಗಳು

38 ದಕ್ಷ ಸಿಬ್ಬಂದಿಗಳು

70% ಮುಸ್ಲಿಮೇತರ ವಿದ್ಯಾರ್ಥಿಗಳು (ಕೋಮು ಸಾಮರಸ್ಯ)

"ಮುಂದಿನ ದಿನಗಳಲ್ಲಿ ಪ್ರೀ-ನರ್ಸರಿ ಕ್ಲಾಸ್‌ ಗಳಿಗೆ ಉಚಿತ ದಾಖಲಾತಿ ಮಾಡುವ ನಿಟ್ಟಿನಲ್ಲಿ ಹೆಜ್ಜೆ ಇಡಲಾಗುತ್ತಿದೆ ಎಂದು ತಿಳಿಸಿದ ಮಹಮ್ಮದ್ ಹನೀಫ್ ಅವರು, ಶಾಲೆಯ ಹೆಸರಲ್ಲಿರುವ 'ನೂರ್' ಅಂದರೆ ಬೆಳಕು. ಈ ಜ್ಞಾನದ ಬೆಳಕು ಮಡಿಕೇರಿಯ ಪ್ರತಿ ಮನೆ‌ ಮನೆಯನ್ನೂ ತಲುಪಲಿ ಎಂಬ ಹಾರೈಕೆಯೊಂದಿಗೆ ತಮ್ಮ ಮಾತುಗಳನ್ನು ಮುಗಿಸಿದರು."