ದಕ್ಷಿಣ ಭಾರತದ ಜೀವನದಿ ಶ್ರೀ ಕಾವೇರಿ ಮಾತೆಯ ಹೆಸರಿನಲ್ಲಿ ನವರಾತ್ರಿ ಉತ್ಸವದೊಂದಿಗೆ ಸರ್ವ ಜನರ ಭಾವೈಕ್ಯದ ದಸರಾ ನಾಡಹಬ್ಬವನ್ನು 1979 ರಲ್ಲಿ ಗೋಣಿಕೊಪ್ಪಲಿನ ಎಂ.ಜಿ. ಪದ್ಮನಾಭ ಕಾಮತ್ ಮತ್ತು ಕೆಲವು ಸ್ನೇಹಿತರು ಸೇರಿ “ಶ್ರೀ ಕಾವೇರಿ ದಸರಾ ಸಮಿತಿ” ಎಂಬ ಹೆಸರಿನಲ್ಲಿ ಗೋಣಿಕೊಪ್ಪಲಿನಲ್ಲಿ ದಸರಾ ನಾಡಹಬ್ಬವನ್ನು ಪ್ರಾರಂಭಿಸಿದರು.

ಗೋಣಿಕೊಪ್ಪಲಿನ ಪುರಸಭೆಯ ಸಭಾಂಗಣದಲ್ಲಿ ಶ್ರೀ ಶಾರದಾಂಬೆಯ ಪ್ರತಿಷ್ಠಾಪನೆಯೊಂದಿಗೆ ಮೊದಲ ವರ್ಷದ ದಸರಾ ಮಹೋತ್ಸವವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಲಾಯಿತು. 7 ದಿನಗಳ ಕಾಲ ಭಾಗಮಂಡಲದ ಎದುರ್ಕಳ ಶಂಕರನಾರಾಯಣ ಭಟ್ಟರಿಂದ ಗೀತಾಯಜ್ಞ, ಒಂದು ದಿನ ಹರಿಕಥೆ ಮತ್ತು ಒಂದು ದಿನ ಗೋಣಿಕೊಪ್ಪಲು ಕಲಾವೃಂದದವರಿಂದ ಆಕರ್ಷಕ ನೃತ್ಯ ಕಾರ್ಯಕ್ರಮಗಳನ್ನು ಏರ್ಪಡಿಸಿ ಸಾಂಸ್ಕೃತಿಕ ಲೋಕಕ್ಕೆ ಮುನ್ನುಡಿ ಬರೆದರು. ನಂತರದ 4 ವರ್ಷಗಳವರೆಗೆ (1979 ರಿಂದ 1982 ರವರೆಗೆ) ಇದೇ ಸಮಿತಿಯು ಉತ್ಸವವನ್ನು ಮುನ್ನಡೆಸಿಕೊಂಡು ಬಂದಿತು.